Filamu ya Gifted Hands: Inaonesha jinsi maisha yako yanavyoweza kuwa somo kwa wengine

Filamu ya Gifted Hands

KILA mmoja ana ndoto zake katika maisha yake. Wengine wana ndoto kubwa za kubadilisha ulimwengu huu, huku wengine wakiwa na ndoto za kuishi maisha ya kupata mahitaji yao ya msingi tu.

Lakini wote hawa wanahitaji kuzitimiza ndoto zao; ila katika safari ya kutimiza ndoto hizi kuna vikwazo na mambo mbalimbali ambayo huwazuia watu wasiziishi ndoto zao na kuishia kulaumu na kulalamika, hasa uzeeni.

Wewe je, una ndoto? Je, ndoto yako ni ya namna gani? Je, umewahi kujiuliza kwamba ufanye nini uweze kuitimiza ndoto yako?

Kimsingi, kila mmoja ana ndoto fulani katika maisha yake ambayo anataka itimie, lakini inawezekana kabisa hajui ni kwa jinsi gani hiyo ndoto inaweza ikatimia, au hajui nini cha kufanya wakati huu.

Inawezekana ukawa una ndoto zaidi ya moja na hujui cha kufanya. Lakini ni lazima ujue kwamba ili ndoto itimie kwa namna yoyote ile inahitaji jambo moja la msingi nalo ni ‘muda’.

Muda ni msingi mkubwa sana wa kutimiliza ndoto zako, ni sawa na kusema huwezi kutimiza ndoto yoyote ile pasipo kuwa na muda.

Muda unahitajika sana, kwa maana ukikosa muda huwezi kutimiza ndoto; mfano, chukulia mwenye ndoto fulani amekosa muda ghafla akafa, Je, ndoto yake itatimiaje naye hakuwa na muda tena wa kuishi?

Lakini jambo jingine kubwa ni kujifunza kutoka kwa watu waliofanikiwa, ambao walifanikiwa kuziishi ndoto zao.

Ipo haja kubwa ya kujifunza kupitia watu waliofanikiwa ili kuweza kufikia mafanikio makubwa. Kupitia mafanikio yao kuna mambo mengi ya msingi tunakuwa tunajifunza na kuachana na makosa ambayo wao waliyafanya pasipo kujua.

Mafanikio ya watu mbalimbali waliofanikiwa hayakuja hivi hivi tu, bali walipitia vikwazo hivi na vile hadi kufanikiwa, ndiyo maana inasemwa kuwa ‘dunia uwanja wa fujo’. Hii maana yake ni kuwa, maisha yaliyopo duniani ni sawasawa na fujo, kwani kila mtu anayekuja duniani huleta fujo zake na baadaye kutoweka.

Mmoja wa watu waliovuka milima na mabonde katika maisha na hatimaye kufanikiwa ni pamoja na Benjamin Solomon Carson Sr., daktari na mtaalamu wa Nyurolojia nchini Marekani.

Ben Carson

Benjamin Solomon Carson Sr., ambaye anafahamika zaidi kama Ben Carson, pia ni mwandishi wa vitabu, akiwa ameandika vitabu vya Take The Risk; The Big Picture; Think Big na Gifted Hands: The Ben Carson Story.

Kitabu cha Gifted Hands (Mikono Yenye Vipawa), kinaelezea hadithi ya kweli inayohusu maisha ya mtaalamu huyu wa Nyurolojia.

Si nia yangu kukielezea kitabu hiki, bali filamu ya Gifted Hands inayotokana na hadithi ya kitabu hiki, inayoelezea historia ya Carson kuanzia alivyokuwa mtoto katika eneo la Detroit hadi wakati akiwa mkurugenzi wa idara ya watoto ya Nyurolojia katika Hospitali ya Johns Hopkins akiwa na umri wa miaka 33.

Gifted Hands ni filamu ya mwaka wa 2009 iliyoandaliwa na Thomas Carter na kuigizwa na Cuba Gooding Jr na Kimberly Elise. Inazingatia hadithi ya maisha ya daktari huyo maarufu wa upasuaji, Ben Carson, kati ya miaka ya 1961 na 1987.

Filamu yenyewe imeandaliwa na Johnson na Johnson Spotlight Presentation na ilioneshwa kwenye stesheni ya TNT Jumamosi ya Februari 7, 2009.

Jina la filamu hii lilikuwa limetumika hapo awali 1992 kwa filamu fupi kuhusu Ben Carson iliyotolewa na Zondervan, ingawa filamu hizi ni tofauti.

Ben Carson (Cuba Gooding) anaanza maisha akiwa katika hali ya taabu nyingi: yeye akiwa mtoto wa asili ya Kiafrika huko Marekani, hana baba na masomo yamemshinda shuleni.

Inaanza akiwa akila vyakula kama vibanzi akitazama runinga na anahitaji miwani. Mama yake aliyeacha shule akiwa daraja la tatu, anaanza kufanya maamuzi kwa ajili yake kwa kuwa anaona mwenendo wa Ben ni mbovu.

Watoto wake wawili, Ben na Curtis, walipohitaji kujua hesabu ya kuzidisha aliwafanya waape kuwa watasoma yeye akiwa ameenda kwenye uchunguzi katika taasisi ya waliorukwa na akili.

Mama yao anapoona kizuizi cha ufanisi wa watoto wake ni runinga anawaagiza wasome vitabu viwili kila wiki kutoka maktaba na kuandika ripoti kuvihusu. Anawapeleka pia kwenye shule bora zaidi.

Wakati huo huo, Ben anaanza kunawiri kimaisha na kiakili. Kwa kipindi hiki Ben anapata miwani aliyohitaji, na anajifunza hesabu ya kuzidisha. Ben anaanza kutafiti ulimwengu wa vitabu, na anaendelea kukua ndani yake. Anaanza pia kuwa na hasira nyingi, hasira hii ingemharibia utoto wake kama isingekuwa muujiza uliomfanyikia.

Baada ya kukaribia kumwua mtu kwa ghadhabu zake, anagundua kuwa amekuwa mateka wa hasira hizo na anahitaji kufanya marekebisho haraka. Anakwenda chumbani mwake na kumlilia Mungu na kuomba kwamba anaweza kumkomboa kutoka kwenye tatizo la hasira.

Katika mtihani anaongoza shuleni katika darasa lake la nane na anaendelea kufaulu hadi kuwa nambari tatu akiwa shule ya sekondari. Kwa jitihada na njaa ya ufanisi, anapata udhamini unaomwezesha kwenda chuo kikuu. Anapita mtihani wa somo la udaktari na hiyo inamwezesha kuenda Chuo kinachofundisha madaktari na wauguzi.

Carson anapata maisha magumu akiishi na madaktari na wanafunzi wenzake akifanya kazi katika Hospitali ya Johns Hopkins. Akiwa huku ndiko anakofanya upasuaji kama bila kusimamiwa na msimamizi akihatarisha kazi yake ya udaktari ili kuokoa maisha ya mgonjwa.

Kwa mafanikio hayo, Ben Carson anaigizwa (na Cuba Gooding) kama daktari wa upasuaji mwenye kipaji katika filamu hii ya Gifted Hands (yaani Mikono Yenye Vipawa).

Ilivyopokewa

Ilipotoka, wakosoaji wa filamu wakaipa filamu hii jumla ya kitaalamu ya alama 63/100 katika tovuti ya Metacritic.com. Huku ikisemwa kuwa, filamu hii ni bora kwa nchi iliyopewa changamoto na rais wake mpya kufanya vizuri.